General Santos City–Gikumpirma ni Police Lieutenant Colonel Rey Egos ang hepe sa Koronadal PNP nga dunay kalambigitan sa trabaho ang usa sa ilang ginasundan nga motibo sa nahitabong pagpamusil sa mag- inahan nga silang Hazna Potri Sabdullah ug Bai Miriam Sabdullah nga susamang nagtrabaho sa DENR-12 ug nanimuyo usab sa Purok Clemente Brgy. Zone 4, syudad sa Koronadal ingon man ang drayber sa trisikel nga si Kenneth Lozada.
Sumala pa ni Egos nga pauli na ang mag-inahan sa ilang boarding house gikan sa trabaho sakay sa trisikel gisundan matud pa sa duha ka wala mailhing suspek nga nakasakay ug motorsiklo ug pag-abot sa lugar didto na gipangpusil ang mag-inahan apil na ang drayber gamit ang kalibre.45 nga armas
Saysay man usab sa opisyal nga human sa panghitabo paspas usab misibat ang mga suspek sakay sa motorsiklo nga walay plakang numero palayo sa lugar
Dugang pa ni Police Lieutenant Colonel Rey Egos nga duna na silay gikonsidera nga person of interest kalabutan sa panghitabo ug padayon gihapon ang ilahang imbestigasyon aron makakuha ug igong ebidensiya nga maoy kinahanglanon aron mapasakaan ug kaso ang mga suspek
Samtang gipaklaro usab sa opisyal nga anaa na sa maayong kahimtang ang driver nga mugawasay na sa provincial ospital samtang ang mag –inahan anaa pa sulod sa balay tambalanan alang sa padayon nga medikasyon.
kahibaloan nga nakaangkon ug igo pinusilan sa nawong si Hazna samtang igo usab sa likod ang inahan niini ug naigo usab sa hawak ang drayber sa trisikel. (Reynald Timario)
