Polomolok, South Cotabato–Gikumpirma ni Police Lieutenant Colonel Marvin Dua-Dua, ang hepe sa Polomolok MPS nga personal grudge nga dunay kalabutan sa away sa yuta ang ilang ginasundan nga motibo sa pagpamusil sa pamilyang Macabangin niadtong milabay nga semana sa Purok 3, brgy. Koronadal Proper, Polomolok, South Cotabato nga gikamatay sa duha ka mga biktima ug pagkaangol sa usa pa.
Sumala pa ni Dua-Dua nga naa na silay mga person of interest sa maong panghitabo apan dili pa nila ibutyag sa publiko gumikan sa padayon nilang gihimong imbestigasyon aron nga matumbok gayud ang mga responsable ug mapasakaan ug tukmang kaso.
Kahibaloan nga una nang gipangpusil sa wala pa mailhing mga suspek ang magpamilya sa panimalay ni Kagawad Aliman kung asa duha ang patay sa miyembro niini nga silang Razil Macabangin, 36 anyos, ingon man si Aserin Macabangin, 25 anyos, samtang samdan usab si Jamaria Macabangin human naigo sa iyang paa nga susamang nanimuyo sa nasampit nga lugar .
Nasayran nga una nang nagpasaka ug kasong arson si Kagawad Aliman Macabangin sa buhatan sa BFP Polomolok human sumala pa gisunog ang sakyanan niini.
kini mao karon ang ginatutukan sa imbestigasyon sa kapulisan aron sayron kung duna bay kasayuran sa nahitabong pagpamusil sa magpamilya kadtong mga tawo nga gikaingong misunog sa sakyanan ni Kagawad Aliman.
Saysay usab sa opisyal nga nakagawas na sa ospital ang usa sa mga biktima sa pagpamusil human nga natambalan ang samad pinusilan niini sa iyang paa samtang ang duha usab nga namatay ang gilayon man usab nga gilubong. (Reynald Timario)
