Naka-alerto ang mga kapulisan sa probinsya sa Bukidnon.
Una ninii gimanduan ni PNP 10 Regional Director PCSupt Timoteo Pacleb ang tanang units sa kapulisan sa rehiyon nga pakusgan pa ang himoon nga seguridad human sa maduguon nga pagbusikad sa IED sa Lamitan City, Basilan kagahapon sa buntag.
Bisan pa man ninii, gisiguro ni Pacleb ngadto sa publiko nga naka-andam kanunay ang kapulisan nga muhatag ug seguridad.
Gi-aghat usab niini ang publiko nga mahimong magmaigmat ug itaho gilayon sa kapulisan kung adunay mga kadudahang tawo o kaha butang sa palibot.
Sa interview sa RMN Malaybalay ngadto kang PSI Jiselle Longakit, ang spokesperson sa PNP Provincial Command gibutyag niini nga dugay na nga naka-alerto ang kapulisan sa probinsya.
Matud niya nga upat ka rason nganong naka alerto sila nga naglangkob sa una, tungod sa martial law, ikaduha, wala pa giubos ang ilang alerto sukad kaniadtong SONA ni Pangulong DUterte, ikatulo ang nahitabong pagbusikad sa Lamitan City ug ang ika-upat mao ang pagbisita ni Pangulong Rodrigo Duterte sa siyudad sa Malaybalay karong Biyernes, Agosto 3 tungod kay pangunahan niini ang inagurasyon sa Northern Mindanao Wellness and Reintegration Center.
