MI-KURTISYA kang Governor Jose Ma. R. Zubiri Jr., ang tanang opisyal sa kapulisan sa probinsya sa Bukidnon sa pag panguna ni Police Colonel Roel L. Lami-ing, Provincial Director sa Bukidnon Provincial Police Office o BUKPPO isip tradisyonal nga gimbuhaton sa kapulisan matag bag-ong tuig ngadto na sa ilang tagsa-tagsa ka mga Local Chief Executives sa ilang lugar.
Sa pasiunang mensahe ni Governor Zubiri, iyang gipaabot ang pasidungog ngadto na sa tanang kapulisan sa Bukidnon sa maayong pagdumala diha sa pagmentinar sa kahusay og kalinaw sa probinsya og iyang gilauman nga kini magapadayun sulod sa iya nga administrasyon.
Sa maong panagtagbo, nagpasalamat usab si Col. Lami-ing sa gihatag nga dakong suporta sa gobernador ngadto kanila diin ang ilang panginahanglanon gihatag sa probinsya.
Mahinumduman nga sa nilabay nga tuig, gihatagan sa probinsya ang kapulisan sa Bukidnon sa pinansyal nga suporta sa kinatibuk-ang kantidad nga sobra sa trayenta’y siyete (37) milyones ka pesos alang sa Peace and Order Fund, Anti-Drug Campaign og uban pa, mga salakyan niini sama sa unom (6) ka Toyota Hi-lux Patrol Car, usa (1) ka Toyota Innova, og usa (1) ka Toyota Furtuner.
Tungod niana, gi-presenter ni Col. Lami-ing ngadto sa gobernador ang mga mahinundanong nahimo sa kapulisan sa katapusang quarter sa tuig 2020 diha sa Campaign against Illegal Drugs diin nabalhog sa bilanggoan ang numero 2,7,9 og 10 nga High Value Individual (HVI) (provincial level), sa Campaign Against Most Wanted Persons diin dako nga nahimo niini ang pagka dakop ni alyas Ating/Sara nga usa ka secretary sa SRC4, NCMRC, sa New People’s Army o NPA nga nabalhog na sa bilangoan tungod sa ubay-ubay nga kaso niini og uban pang kumpanya batok illegal nga aktibidadis nga nahimong na rekognisa isip best performing office sa Northern Mindanao sulod na sa tulo ka tuig.
Alayon sa kahusay og kalinaw, gihisgutan sa gobernador nga iyang pagatutokan ang pag pangeta’g solusyon sa mga lumad kabahin sa ilang mga yutang kabilin nga angayan’ng ma plastar og mahatag na kanila sa dili madugay nga panahon.
Gawas niana, gihisgutan sa gobernador nga palig-onon pagbalik ang pag bantay sa entry points sa Bukidnon aron ma proteksyonan ang katawhan batok sa COVID19 og kini iyang hangyuon ang mga mayores nga istriktohon gayun ang pagbantay usab diha sa ilang mga lungsod og syudad nga dili malutsan aron magpabilin nga ubos ang kaso niini.
