General Santos City—Padayon ang pagmonitor sa kapulisan sa Sultan Kudarat sa nagkadaiya nilang munisipyo aron nga dayong marespondihan sa higayon nga dunay magkinahanglan ug tabang tungod sa baha ug landslide nga posibleng mahitabo tungod sa bagyong Vinta.
Kini gibutyag ni Col Raul Supiter- Provincial Director sa Sultan Kudarat pnp kagahapong adlawa atul sa paghapak sa nasampit nga bagyo dinhi sa Mindanao. Sumala ni Supiter nga nakasinati ug ulan ang ilang probinsya apan base sa ulahi nilang monitoring wala pa may natala nga pagbaha ug pagkahugdno sa yuta sa ilang lugar.
Giangkon ni Col Supiter nga dunay mga munisipyo sa Probinsya sa Sultan Kudarat nga dunay mga flood prone ug landslide prone area ug usa na niini ang munisipyo sa Lambayong.
Sukad kagahapon ila matud pang ginabantayan ang level sa tubig sa allah river sa Lambayong nga sumpay sa South Cotabato tungod sa posibilidad nga pagbaha.
Apan sa labing ulahing interview sa rmn Gensan kang Supiter gibutyag niini nga walay mga nareport nga nagkinahanglan ug rescue. Aminado si Col Supiter nga karong kapaskohan wala nila gipatuman ang no leave ug no absent nga polisiya sa PNP.
Luyo niini gipaniguro sa opisyal nga intact ang tanan nga mga on duty nga miembro sa kapulisan sa probinsya.
Hinuon wala na matud pay mga dagkong aktibidad alayon sa kapaskohan ang ilang mga lokal nga kagamhanan apan ilang ginatutukan karon ang bahin sa kahimtang sa panahon sa ilang probinsya.(Jordan Britos)
