Dead-on-arrival sa balay-tambalanan ang drayber sa usa ka motorsiklo human nag karambola ang upat ka sakyanan didto sa Sayre Highway, Magsaysay, Brgy. Kuya, Maramag, Bukidnon adtong Domingo.
Giila ang namatay nga si Virgilio P. Sibastian, 24 anyos ug residente sa Purok-4, Brgy. Adtuyun, Pangantucan, Bukidnon.
Sumala sa taho sa kapulisan, nga gadagan ang usa ka Toyota Avanza nga sakyanan padulong sa Valencia City, pag-abot sa kurbada nga bahin sa naasoy nga lugar kalit nga miliko ang usa ka Rusi nga motorsiklo hinungdan sa pagkasapon sa wala nga bahin niini sa Toyota Avanza, nalagpot ang mga sakay sa maong motorsiklo ug nabangga sa Avanza ang mga katabo niini nga motor ug multicab. Dali-dali nga gipangdala sa Pangantukan Medical Hospital ang mga nasamdan apan gideklara nga dead-on-arrival ang drayber sa maong Rusi nga motor.
Dakong pahisubo ang gipadangat ni PCOL Jun Mark J. Lagare, Police Provincial Office Director ngadto sa mga kabanay sa nakabsan sa kinabuhi ug mipahimangno sa mga motorista nga magsunod sa balaod trapiko aron nga mahilikay sa mga disgrasya.
Samtang, Gidala na sa Maramag Municipal Police Station ang mga nalambigit nga mga sakyanan alang sa tokmang disposasyon ug gapaayo na sa balay-tambalanan ang mga nasamdan sa maong disgrasya.
