KASAL-SAKAL: CHURCH ANNULMENTS COULD BECOME COURT-LIKE JUDGMENTS (Part 2) – Ini An Ley Series w/ Atty. Angel R. Ojastro III

Good morning po sa mga paradangog kan DWNX. Maray na aga man ki Dr. Vito Borja kan City Health, paradangog ta po si Doc, dati kong kaibahan sa City Hall kan panahon ni Mayor Jesse Robredo, sibot-sibot man ngonian si Doc sa pag-asikaso kan mga athletes sa Bicol Meet. Relax lang Doc ta baka mahighblood ka. Suodma po palan, madalan kuta kita ning contact sports sa LCC Mall, naabotan ta si mga parakawat ning wrestling kan iba-ibang provinces, quite disappointed po sinda sa tournament organizers ta napostpone si mga kawat dahil ang competition guidelines binago na naman daa kang oras na ning competition. Sana po maging mas organisado and coordinative ang tournament managers. Kadaklan po sa mga participants mga pobre man, lets not make things difficult and costly for them.
Ipadagos ta po ngonian na aga and discussion ta manongod sa mga kasal sa simbahan asin pagpawara ning bisa kan kasal sa paagi kan saindong church, tungkol sa House Bill 6779.
i-recap ta po ang sinabi ta suodma about sa HB 6779.
Ang kasal po daa na ginibo sa padi, sa church minister kan ibang Christian churches, sa rabbi kun ika Hudyo, o sa presiding elder kan arin man na simbahan o sekta sa Pilipinas, na pigpawarang bisa man sa nag officiate na simbahan o sekta uyon sa doktrina o pagtubod kan church or religious sect, ang church annulment na yan magkakaigwa ning parehong legal effect siring sa judgment kan sarong husgado. Boot sabihon, pag pig imbalido na kan saindong church o sekta ang saindong kasal, dai na nindo kaipuhan pa magfile ning separate na kaso sa husgado ta ang papel na kapot nindo hali sa church nindo puede ng iparehistro sa local civil registrar, sa PSA, bilang pagrecord sa annulment. Sabi pa po sa bill, ang status kan mga aki san a invalidate na kasal sa simbahan siring man sa status na sabi sa Family Code kung ini nag agi sa husgado, boot sabihon, legitimate children man po giraray ang saindang status. Siring man sa custody kan mga aki.
Sabi po kaya sa bill, dapat ang nagpapa annul sa church na mag-agom ilaag o isurat sa public document o sa notaryadong papel ang saindang agreement tungkol sa detalye ning barangaan kan properties ninda, saka kung ano pa ang gusto nindang arrangement sa custody kan mga aki. Pag mayo kamong agreement, ang provisions kan Family Code ang susunudon. Mas maray kung mapatabang kamo sa abogado sa pagdraft kan saindong agreement, pag ley na ang bill.
Ano po ang sabi kan Family Code manongod sa epekto kan annulment, kung mayong agreement ang mga lado?
1. Sabi sa Art. 49, pag mayo ning nakasurat na agreement ang mag-agom, ang husgado iyo ang ma order kung pano ang pagtao ning support sa mag-agom saka sa custody and support man kan mga aki ninda, uliton ko po, aki ninda bakong aki lang kan saro, dapat common children, sa common children kabali po dyan ang adopted na aki na parehong inadopt kan mag-agom, nag-agi sa proseso ning legal adoption, bakong padakula lang.
2. ang husgado tatawan ning halangkaw na consideration ang moral saka material na karahayan kan mga aki saka sa choice kan mga aki kung kisay na magurang maiba. Tatawan ning tamang derecho sa pagbisita sa mga aki ang magurang na dai tinawan ning custody.
3. Tungkol sa mga epekto sa property relations kan mag-agom, natokar ta na po dati yan.
Pano po si mga creditors kan mag-agom kung babangaon na ang properties sa paagi lang ning notaryadong document? Ta sa Family Code, pag sa husgado ang annulment, ang husgado ma order sa mag-agom na padarhan ning notisya ang saindang creditors para informar na pigliliquidate na ang properties. Sabi po baga sa House Bill, pag dai nacover kan agreement kan parties, ang Family Code ang ma apply, boot sabihon, dapat tawan man ning notice kan mag-agom ang saindang mga nautangan habang binabaranga ninda ang properties. Ano po ang epekto kung dai ini macomply? Puede kamo lamagon pareho kan saindong nautangan, dai puede sabihon na si saro man lang ang nag-utang, ang naidistribwir ng separadong property dai puede sabihon na dai na puede lamagon, ta kung kan panahon na kamo nag utang, conjugal property pa o absolute community property pa ini.
Sa pagbaranga po nindo kan properties, in case mayo kamo malinaw na agreement sa dokumentong notaryado in case of church annulment, ang susunudon iyo ang mga provisions kan Article 102 saka 129 kan Family Code. Yan po manongod sa distribution kan assets and liabilities. Sabi ta ngani, pag mayo yan sa agreement, later on, ang sisay man sa dating mag-agom, o ang saindang aki, puede magfile sa husgado ning petition para sa tamang distribution kan assets base sa Articles 102 saka 129 kan Family Code. Kung interesado po kamo maaraman kung anu-ano ining mga nakapalaog sa Articles 102 saka 129, magtext or call po sa numbers kan DWNX, ta medyo halawig ang nakasaysay na requirements kan ley. Puede man ihapot na nindo sa saindong dodolokon na abogado.
Ipadagos ta po ang sabi kan Family Code, in case dai nanggad mailaag sa notaryadong agreement ang tungkol sa properties. Ano pa po ang sabi kan House Bill 6779 in relation sa Family Code?
Pag nagbaranga ning properties, ang valor kan inaapod na presumptive legitimes o advance na mana kan mga common children, kukwentahon puon sa petsa kan pagiging final kan decree of annulment hali sa saindong simbahan, pastor, rabbi o ministro. Depende po sa internal rules kan saindong simbahan kung kasuarin ang decree magiging final. Kaya dapat po ang mga simbahan, ang mga other Christian Churches, dapat po magprepara na kamo ayuson ang mga rules nindo on how to annul marriages.
Ang advance na mana kan mga aki dapat po itao sainda in cash, property o shares of stocks asin iba pang tamang secured na paagi. Kung ang aki menor de edad pa, siempre igwa sya ning guardian, ang guardian mismo puede iyo ang maghagad sa husgado kan enforcement kan derechong ini kan aki. Sisay po ang puedeng guardian? Ang natural legal guardian kan aki iyo si magurang na pinagtawan ning custody nya pagkatapos kan annulment sa church, sabi sa bill. Ang aki mismo, kung nasa tamang edad na, can later on ask sa husgado na maitao saiya ang advance nyang mana. Ang advance na manang ini dai man boot sabihon na later on dai na makakakua ning dagdag na mana ang aki kung ang arin man sa magurang nya magadan na.
Pano po kung pagkatapos kan church annulment gusto mag-agom giraray kan dating mag-agom, puede daw po? Depende po sa saindong simbahan, ta kung may rule sa church nindo na bawal mag-agom giraray, ilalaag yan sa decree issued kan saindong Obispo, pastor, o ministro. Kung mayo man ning pagbabawal kan saindong simbahan, ang Family Code ang ma-apply sabi kan House Bill, boot sabihon, puede kamo magagom giraray, basta idistribwir muna ang saindong properties uyon sa saindong agreement o uyon sa Family Code. Ano po ang epekto pag dai nindo pigdistribwir ning tama ang properties kabali ang advance na mana kan aki nindo dawa menor de edad? Imbalido po ang sunod ning pag-agom, asin ang mga rights kan magiging aki nindo sa sunod na agom puedeng maapektuhan.
Sabi pa po sa House Bill, ang annulment decree kan saindong simbahan dapat iparehistro nindo sa local civil registrar sa laog lang ning 30 days puon kan maresibe nindo ini, asin puede man magtao ning dagdag na conditions ang saindong simbahan sa mga dapat nindong gibohon pagkatapos kan issuance kan decree.
Kung kamo po maagom giraray, makua kamo siempre ning marriage license sa local civil registrar, ang lado na naimbwelto sa church annulment na mapakasal otro dapat magsumitir ning certified true copy kan church annulment decree na rehistrado. Sain po nindo ini kukuanon ining certified copy? Sa local civil registrar kung sain nindo pinarehistro. Sain na civil registrar dapat iparehistro ang church decree of annulment? Sa civil registrar na may sakop sa saindong simbahan na nag issue kaini.
Balikan ta po ang hapot kan texter ta, kung ano ang magiging epekto kan House Bill sa mga church annulment decrees bago pa maging ley ang bill. Dahil mayong nakalaag sa bill na ini ma apply sa mga church annulment kaidto pa, dai ini ma apply saindo. Ta sabi kan Civil Code, sa Article 4, ang mga ley dai puede maging retroactive ang effect, apuera nalang kung ini sinasabi kan ley. Kung gusto po nindo na magkaigwa ning arog kayan na provision sa ley na tugutan si mga enot pang church annulment marecognize, suratan po nindo ang senado na dagdagan ang provisions kan bill.
Ayan po, sana nakacontribwir kita sa kaaraman kan publiko. Magtext or call lang sa numbers kan DWNX kung may mga hapot na legal.
Bago po ako magpaaram, pagirumdom po sa mga churches, sa mga padi, pastors, ministers, istrikto po ang guidelines kan Diyos sa pagpasuhay sa mag-agom. Ang satong church annulment rules should be consistent with what the bible says. Sabi sa bible sa –
Mark 10:9 King James Version (KJV) 9 What therefore God hath joined together, let not man put asunder.
Saro lang po ang klaradong ground for church annulment sa Bible, ini po sinabi mismo kan satong Kagurangnang Hesus, yaon sa –
Matthew 19:9 King James Version (KJV)
9 And I say unto you, Whosoever shall put away his wife, except it be for fornication, and shall marry another, committeth adultery: and whoso marrieth her which is put away doth commit adultery.
Saro po sa 10 commandments kan Diyos, sa Exodus 20:14, Thou shall not commit adultery.
Saaga, satong totokaron ang manongod sa business permits, ano ang discretion saka limitasyon kan mga city, municipal and provincial governments sa business permits, ta dakul po nagdolok sato, naghahapot sa NX, sa issue na yan. Mga negosyante, mga vendors, abangan yan saaga.
Let me share with you ini pong sabi ni Albert Einstein, one of the most famous na scientists, saiyang quotation ini para sa mga mag-agom: “Love is a better teacher than duty.”
God bless you all.
Ini po si Atty Angel Ojastro III
Aramon an saindong derecho, INI AN LEY!!!