General Santos City–Aminado karon ang kasamtangang Regional Director sa DPWH 12 nga si Basir Ibrahim nga hangtud karon duna gihapoy gadangop sa ilang buhatan nga gareklamo batuk sa ilang buhatan bahin sa maong isyu sa Road Right of Way Scam.
Aminado ang opisyal nga nahasul na siya niini ug gani maoy nahimong hinungdan nga wala na niya mahimo ug tarong ang iyang trabaho isip labaw sa DPWH sa rehiyon 12.
Kini gumikan kay halos tanan niyang oras ang nakatutok na lamang karon sa pagatiman sa mga reklamo nga ginapasaka batuk sa Department Of Public Works And Highways. Kalabot niini namahayag si DPWH-12 Director Ibrahim atul sa gipahigayong imbestigasyon nga bugtong mahimo sa ilang buhatan mao ang pagtugyan nalang niini sa korte..
Pagpasabot niini nga sa higayon nga dunay mga reklamante nga buot mukuha sa bayad sa ilang yuta nga nagamit sa proyekto ila nalang i-entertain pinaagi sa pag-evaluate sa reklamo dayon ila nalang ipasa sa buhatan sa Solicitor General.
Apan ang mas dali matud pa nga pamaagi mao ang pagpangunay mismo sa claimant sa pagpasaka niini ngadto sa korte tungod ang korte matud pa gihapon ang mag-determina sa kaso. (Jordan Britos)
