Natugkad na gyud sa mga residente ang epekto sa hinay nga liderato sa siyudad karon human ang syudad sa Iligan nahimong pinaka-ubos sa ranking isip pinaka ‘competitive city’ gikan sa Department of Trade and Industry, miingon si Congressman Frederick W. Siao.
Kana nga resulta sa 2018 ranking sa DTI nagpadayag ug mga hinungdan sa pag-antos sa mga Iliganon ilawom sa kasamtangang nagdumala sa city hall.
“Mahal na ang pagpuyo sa Iligan ug mao sab ang mga palitonon para makasugakod sa pagpuyo nga gitawag ug cost of living nga karon anaa na sa 135th ang ranking sa atong syudad. Taas na kini kaayo ug dili maayo nga senyales,” miingon si Siao.
“Taas na gani ang cost of living, mao sab ang pangapital sa pagnegosyo o gitawag nga cost of doing business nga naapektuhan bisan ang mga gagmay natong mga negosyante sa Iligan tungod kay anaa na kita sa layo nga ranking nga ika 135th.” dugang sa kongresista.
Ang atong ubang ranking sa paglambo o competitiveness sa DTI nagpakita usab nga ubos na kaayo ang Iligan sama niining mosunod nga kategorya:
– Economic Dynamism: 146th place- Government Efficiency: 121st place- LGU Investment: 106th place- Utilities: 111th place- Presence of Investment Promotion Unit: 138th place- Business Registration Efficiency: 133rd place- Recognition of Performance: 122nd place- Capacity of School Services: 126th place- Presence of Business and Professional Organizations: 104th place. Nanawagan si Siao sa hinanali nga kabag-uhan o gitawag kini ug course correction nga mosubay gikan sa nawala nga tumong paingon sa saktong direksiyon ang siyudad para matabangan ang Iliganon sa tarong ug maayong pamuyo.
“Wala na gani makasulod sa 100 nga ranking, gi-pilde pa ta sa ubang mga munisipyo nga unta kung bu-ot huna-hunaon, usa na ta sa highly urbanized city. Luoy kaayo atong ranking kay naa ra sa ika-117th place,” pamahayag ni Siao.
Kabahin ni mayoralty contender Marianito ‘Dodong’ Alemania, aron makahatag og daghang trabaho, kinahanglang adunay mga negosyo nga moabli ug daghang trabaho para sa mga Iliganon. Mahusayong pag rehistro sa mga negosyo, hapsay nga pag access sa mga sentro sa pagpalambo sa negosyo o investment promotion centers nga makatabang sa pagiya sa mga gagmay ug dagkong negosyo sa Iligan , pagpataas sa kapasidad sa mga tunghaan aron makadawat og daghang mga estudyante ug himoong nindot ug maayo ang mga pampublikong pasilidad.
“Usa pa, duna man tu-od kitay city hall ug mga city officials, apan ubos man gihapon ang grado sa kahapsay sa pang gobyerno sa Iligan o government efficiency tungod kay naa sa 121st ang ranking sa Iligan. Di lang kini maka-ulaw kundi nadamay pa ang mga Iliganon sa ilang kahinay ug kapalpakan,” pamahayag ni Alemania.
Samtang si aspirant vice mayor Samuel ‘Tatay’ Huertas miingon nga ang Iligan adunay dakung kahigayonan sa pag-lambo sa kompetensya sa akomodasyon sa torismo ug sa panglawas nga imprastraktura, mao usab ang kapasidad sa maayong serbisyo para sa may mga balatian ug pagtuman sa mga nasudnong direktiba.
“Kinahanglan nga mabati sa mga Iliganons ang mga kabag uhan o reporma nga gipatuman sa administrasyong Duterte, apan ang mga problema mao kini: ang administrasyon karon dinhi sa iligan hinay ang pagtuman sa mga nasudnong direktiba o national directives, dugang pa kini nga kulang pud ang mga madayunang disenteng pasilidad para sa mga turista, ug kulang ang mga dapat kapasidad sa mga ospital nga dapat gyud dugangan,” miingon si Huertas.
Miingon si Siao, kung kabahin sa mga imprastraktura ug pagkamalig-on o resiliency, dinhi nga natad siya nakahimo og marka tungod sa iyang paspas nga mga proyekto nga iya nang napamatud-an. Dinhi, matud pa, milanding ang Iligan sa rank 45th sa resiliency ug 95th rank sa imprastraktura.
“Akong gihimo ang akong trabaho nga dunay dedikasyon ug pagkamatinud anon. Makita man sa mga residente ug sa DTI ang mga ebidensiya nga mga kalsada, eskwelahan ug uban pang mga proyekto,” miingon si Siao.
“Pero ang problema mao ang kasamtangang pangagamhanan sa siyudad tungod kay pakyas sila sa pagpalambo sa ekonomiya o economic dynamism ug dili epektibo ang ilahang pagdumala. Ang ilang KAKULANG SA KATAKUS SA PAGDUMALA maoy nagbira paubos sa Iligan maoy hinungdan nga naglisod ang mga Iliganon karon,” panapos ni Siao.
