Gisugdan na sa Misamis Oriental Provincial Tourism Office ang kasaulogan sa Tourism Week 2018.
Alayon niini, gilaumang modagsang na usab ang gatus ka libo nga turista dinhi sa lalawigan.
Matud ni Gobernador Bambi Emano nga sa unang adlaw pa lang, Setyembre 10, nagpungasi na ang mga kalihukan alang sa pag-aghat sa mga turista nga mosalmot sa kasadya ug kalipay ning maong panahon.
Sa Setyembre 11, dunay himuong grand launching sa “Tienda sa Misor: A MisOr Food Exhibit” kung asa i-showcase ang tanang produkto sa Misamis Oriental.
Lakip na niini ang mga pagkaon nga gama sa taga Misamis Oriental nga karon nagpatuyang sa ilang kasikat.
Sa susamang adlaw usab dunay ipahigayon nga grand launching sa Association of Tourism Officers of the Philippines (ATOP) national convention.
Ang maong convention salmutan sa tanang tourism officers sa tibuok nasud sa Pilipinas.
Dili usab magpaulahi ang mga dunay abilidad sa pagkanta kung asa mosalmot sila sa Search for the Misamis Oriental Singing Ambassador sa Activity Center, Ayala Centrio Mall.
