General Santos City–Posibleng mahagbong sa areglo ang kaso sa 18 anyos nga si Alaica Grajan, driver sa SUV nga mipasok sa salon nga nahimutang sa Dacera Avenue, Barangay City Heights, Gensan nga hinungdan sa kamatayon sa ginang nga si Fiesta Mae Cedeño, 30 anyos nga taga Barangay City Heights, Gensan.
Sumala ni PO3 Marvin Roy Cloma, imbistigador sa Traffic Management Unit, nag tagbo na ang duha ka kampo sa ilang buhatan aron hisgutan ang bahin sa areglo sa kaso.
Saad sa pamilya sa driver nga ilang tubagon ang tanang balayranan sa pagpahiluna sa patayng lawas sa biktima ug maghatag usab sila ug pinansyal nga tabang ngadto sa pamilya. Hatagan usab sa pamilya sa driver ug suporta ang duha ka gagmayng anak sa namatay nga biktima.
Samtang tubagon usab nila ang pagtransfer sa patayng lawas sa ginang didto sa Isulan, Sultan Kudarat.
Sa karon ginahuwat nalang sa Traffic Management Unit ang pinal nga desisyon sa pamilya sa ginang bahin sa inisyal nga nasabutan nga magpaareglo nalang.
