Gikonsiderar na nga sulbad ang kaso sa 38 anyos nga negosyanteng si Robert Luz nga taga-Sto. Niño, Jasaan, Misamis Oriental, kinsa gitulis patay niadtong miaging bulan sa Tablon Highway ning syudad.
Kini ang gipahibalo sa Cugman Police Station human nga nasikop ang tulo ka suspek nga sila si Rolly Bazares, Daniel Buyan ug Oliver Saluday, nga pulos taga-Agusan del Norte.
Mahinumdoman, nga gikan nag-withdraw niadtong higayona ang biktima dihang gitulis kini sa maong mga lalaki kung asa, nadala ang iyang 140-thousand pesos nga kwarta.
Nasikop ang maong mga suspek sa Sumilao, Bukidnon human kini makorner sa militar ug kapolisan, human nga gitulis usab nila ang usa ka manager sa Coop sa Malaybalay City.
Gibutyag ni SPO3 Faustino Casiñas sa Cugman Police Station, nga nasayran nila nga ang mga suspek maoy mitulis patay kang Luz, human usab nila giangkon ang maong krimen.
Kini dihang gipaubos na sila sa interogasyon sa kapolisan sa Malaybalay, human sila nasikop human sa pagtulis sa usa ka manager sa Coop sa maong syudad.
Tungod niini, giandam na nila ang mga kasong ipasaka sa tulo ka suspek nga usa ka grupo sa mga tulisan.
Nasayran usab nga mibyahe ang pamilya Luz sa Malaybalay City, Bukidnon aron atubangon ang mga suspek.
by: RadyoMaN Ellah Baculio
