Kaso sang balatian nga filariasis sa South Cotabato nadugangan.

Nadugangan sang syam pa ka mga indibidwal ang nagpositibo sa balatian nga filariasis sa mga sitios sang Datal Falan, Coong kag Moto Sapang sa Barangay Ma’an, T’boli South Cotabato sa ginpatigayon nga surveillance sang Mosquito-borne Disease (MBD) Team sang Integrated Provincial Health Office (IPHO).
Suno kay Supervising Sanitary Inspector Jose Barroquillo Jr. ang syam ka mga persona ang nagpositibo sa nasambit nga balatian matapos ang ginpatigayon nga Filaria Test Strip sa diin sa 180 ka mga slides nga gingamit kag 27 ka mga slides ang ginpaidalom pa sa Filariasis Blood Smearing Test para sa confirmation.
Sa subong nagalab-ot na sa 37 ang naigo sang nasambit nga balatian halin Enero subong nga tuig.
Kaangot sini nagpatigayon sang Mass Drug Administration (MDA) ang Mosquito-borne Disease (MBD) Team sa 749 individwal kabahin sang treatment activity kag prevention batok sa nasambit nga balatian.
Ginpahayag man ni Barroquillo nga nagpatigayon man sila sang indoor kag outdoor residual spraying sa 169 ka mga balay, 2 ka mga eskwelahan nga amo ang Ma’an Elementary School kag Ma’an National High School, nagdistribute man sila sang 200 ka panid sang Long-lasting Insecticide Treated Nets (LLITN) kag nagpatigayon sang information kag health promotion drive sa mga residente sa lugar.
Lakip man sa pipila ka aktibidad nga ginpatigayon sa lugar sang IPHO ang pre-natal check-up sa mga buntis, de-worming sa 25 ka mga indibidwal, sputum collection, medical check-up sa non-communicable disease, Operation Timbang kag iban pa.
Ginpahayag man ni Barroquillo nga ang masunod nga aktibidad nga ila ipatigayon sa nasambit nga lugar ang pagpatigayon sang indoor residual spraying (IRS), FTS and Nocturnal Blood Examination sa Sitio Elsok kag Purok Afus sa Ma’an, T’boli, Mass drug administration sa Sitio Elsok, Purok Afus kag Sitio Datal Tablo sa nasambit nga banwa, padayon nga monitoring and surveillance sa iban nga barangays kag sitios, intensify mosquito-borne activities and interventions (health prevention, IEC activities, case findings), treatment-follow-up of children with coryza, and, planting of vitamin C-rich fruits kapareho sang calamansi.
Upod naman sang IPHO-MBD Team ang T’boli Municipal Health Office, Department of Health, Barangay Affairs Unit kag Barangay Local Government Unit sa banwa sang Ma’an. T’boli.
Wala naman sang nagpositibo sa Malaria sa nasambit nga lugar sa ginpatigayon nga Rapid Diagnostic Test (RDT).