Nadugangan sang isa ang kaso sang COVID-19 sa syudad sang Bacolod subong nga Miyerkules, June 3.
Suno sa pinaka-ulihi nga update sang Department of Health Western Visayas, nagpositibo si WV Patient No. 116 (Bacolod Patient No. 15), 38 anyos nga lalaki nga taga Bacolod.
Suno kay Inter agency Task Force head, Bacolod City Vice Mayor El Cid Familiaran sa interview sang DYHB, ini siya ang nalakip sa mga repatriated overseas Filipino workers (OFW) kag karon ang naka-facility quarantine. Nag-abot ang swab result sini subong nga adlaw apang nag positibo sa virus kag subong nga adlaw maga tapos man kuntani ang ila nga mandatory 14-day quarantine kag sarang na makapauli sa ila nga pamilya.
Si Patient 15 ang isa ka nurse sa cruise ship nga naghalin sa Miami, USA
nga nagpositibo sa covid test, apang pag abot sa Manila ini ang nag negatibo naman sa ginpatigayon nga swab test.
Sa kabilugan may lima na ka repatriated OFWs sa Bacolod ang nag-positive sa COVID-19, isa ang naka-recover na kag apat ang naka-quarantine pa.
Nagdugang man sang isa ang kaso sa probinsya sang Iloilo matapos isa man ka 33 anyos nga babaye nga repatriated OFW ang nagpositibo sa virus.
Sa karon base sa record sang DOH Region 6, may 117 cases na sang COVID-19 sa rehiyon.
[image: image.png]
