Yara pa sa below threshold ang kaso sang balatian nga dengue dire sa probinsya sang South Cotabato bisan matuod nga nagasaka ang kaso sa subong nga panahon.
Suno kay Provincial Mosquito Borne Disease Coordinator Jose Barroquillo base sa datos yara na sa 589 ang narekord nga kaso sang balatian nga dengue sa probinsya kag 3 ang patay nga halin sa banwa sang Banga, Polomolok kag T`boli halin Enero tubtob June 12 subong nga tuig.
Apang ang nasambit nga kaso suno pa ang manubo sang 77 percent kumparar sang nagligad nga tuig sa kapareho nga period nga may 2,548 ka kaso kag 20 ang patay.
May-angot sini, ginaawhag nila suno kay Barroquillo ang mga pumuluyo nga ipatuman gid ang 4s nga amo ang search and destroy sa breeding places sang lamok nga nagadala sang balatian nga dengue, secure self-protection, seek early consultation, support spraying kon kinahanglan na gid agud nga indi na liwat magkaoutbreak sang dengue sa probinsya subong nga tuig.
Suno kay Barroquillo indi lang ang COVID-19 ang bantayan kundi pati na ang balatian nga dengue nga kon may lagnat ang kabataan sang 2 ka adlaw ang ipacheck-up na gilayon.
Nahibaluan nga ang balatian nga dengue ang isa man sa balantayan sa subong nga panahon matapos nga sang nagligad nga tuig may-yara sang outbreak sang balatian nga dengue sa South Cotabato matapos nga narekord ang mataas nga kaso kag nagsaka ang numero sang nabawian sang kabuhi.
