Nagasaka sa gihapon ang kaso sang Human Immunodeficiency virus ukon HIV sa South Cotabato bisan nga ginpatuman ang Enhanced Community Quarantine kag Calibrated Lockdown sa probinsya tungod nakarekord ang Integrated Provincial Health Office sang walo ka panibag-o ka nagpositibo sa nasambit nga balatian.
Samtang suno kay John Arlo Codilla, Infectious Disease Program Coordinator sang IPHO padayon ang ila ginapatuman nga HIV testing sa mga HACT clinic kag subong man sa mga rural health units sa tagsa ka mga lugar.
Ginpahayag niya man nga nagapadayon ang paghatag nila sang HIV treatment sa mga pasyenti dire sa probinsya kag ang sa kleyenti nga yara sa gwa sang South Cotabato ang nagapadayon man tungod may sistema naman sila nga ginapatuman paagi sa pagbutang sang ARV refilling sites sa mga probinsya kag may mga coordinators man sa pagdistribute sang bulong ini matapos nga padayon nga sarado ang mga border areas sang probinsya.
