Katalagman

24

Pag-ampo ug pagsalig sa Dios ang nahimong panagang ni Yoyong Sendo dihang kalit mihapak ang baha sa siyudad sa Dabaw dala sa Bagyong Vinta nga miigo sa bukidnon buwan sa Disyembre sa miaging tuig.

Matud ni Yoyong, sa iyang kapin 20 ka tuig pagpuyo daplin sa Davao River sa Don Julian Maa kadto pa sila nakasinati sa pinakadako nga baha nga halos mibanlas sa ilang balay ug mga gamit.

Dako ang pagtoo ni Yoyong nga naka-survived siya ug ang iyang pamilya gumikan sa ilang pagsalig sa Diyos sanglit kun wala pa sila mindangop ug nangayo og panabang sa Ginoo malagmit lakip sila banlason sa nagwala nga tubig baha.

Hangtud karon wala pa gihapon nakarekober si nanay Merlita Patarata ug residente sab sa samang dapit gikan sa halos upat na ka buwan nga dilobyo sa baha hatud sa Bagyong Vinta.

Hapit lapaw sa balay ang pag-awas sa tubig sa Davao River busa daghan sa iyang mga gamit sama sa mga appliciances nangadaot ug wala na gyod napahimusli sama sa kotson nga lingkuranan.

Nagtoo si nanay Merlita nga ang nasinati nga kalamidad sa baha nagpasidaan sa kapungot sa Dios alang sa tanan tungod kay wala na’y panahon ang mga tawo sa Ginoo.

Bisan paman sa maong panghitabo wala maapektohi ang pagtoo ni Nanay Merlita sa Dios inay mapasa-lamaton pa kini ngadto sa Ginoo taliwala sa pagkuskuso sa dakong baha sa ilang lugar.

Giingon ni Nanay Merlita nga sa panahon sa kalisdan ug kakuyaw sa kinabuhi walay lain dapat sangpiton ang tawo gawas lang sa Diyos sanglit dili magpanuko ang Ginoo sa pagluwas sa mga tawo nga magatawag sa iyang pangalan.

Mas misamot pa ang pagdutdot sa pagtoo ni Nanay Merlita sa Ginoo karon human iyang napamatod-an ang kagamhanan sa Diyos dihang giluwas sila gikan sa katumpawakan sa kalamidad sa baha.

Gidasig pa niini ang tanang tawo kansang nawad-an og pagsalig sa Diyos nga mubalik na sa poder sa Ginoo samtang dili pa ulahi ang tanan niining panahon sa Semana Santa.

RadyoMaN Joel Viray

Facebook Comments