EB MAGALONA, NEGROS OCCIDENTAL – Natiruhan kag napatay ang isa ka ginakabig High Value Target nga drug personality matapos nga ini ang nagbato sa mga utoridad sa ginpatigayon nga buybust operation may mga las 6:20 kagab-i sa Barangay 2.
Ginkilala ang suspek nga si Noel Bolivar, Alyas Ampatuan, 38 anyos ang edad, kasado kag pumuluyo sang Barangay Tabigue, EB Magalona.
Si Alyas Ampatuan ang ginakabig high value target sa probinsya nga miembro sang Divinagracia Drug Group sang Silay City.
Siya man ang No. 1 sa watchlist sang EB Magalona PNP sa diin ang iya utod nga amu naman ang No. 2 nga natigayon man nga madakpan sang nakaligad.
Lima ka igo sang bala ang iya naagom sa diin narecover ang iya .45 kalibre nga pistola nga nastock-up naman ang baseyo sa sulod sang iya ini ginpalupok.
Namutikan sini nga pulis ang nagbakal sa iya rasun nga dumalagan ini sa kilid sang isa ka balay sa Barangay 2.
Suno kay PSInsp. Jaynick Bermudes, hepe sang EB Magalona PNP nga nag-resist kag nagbato si Ampatuan gani napilitan ang mga pulis nga tiruhon na gid lamang.
Ginkasubo man sini ang natabo sa diin indi man mahimo nga indi sila magbato bangod sa amu nga tion gintiro na sila ni Ampatuan.
Ang buybust ginpatigayon sang joint elements sang EB Magalona Municipal Police Station kag Provincial Drug Enforcement Unit sang Negros Occidental Provincial Police Office. /dyHB BACOLOD
