Gikumpirma ni Land Transportation Franchising ang Regulatory Board kon LTFRB Director Aminoden Guro nga ugma na Hulyo 31 ning tuiga ang katapusang paghatag nila sa Pantawid Pasada Program fuel card subsidy, sa mga driver/ operator sa mga Public Utility Vehicle.
Matud ni Guro nga dugay na nga programa ang pag-distribute sa LTFRB sa fuel card subsidy, gani ikapila na nila kini nga higayon nga gitapos apan tungod sa mga hangyo ila na usab kining gilugwayan.
Apan base sa impormasyon gikan sa central office sa kaulohan, ugma na ang katapusan nila nga pagdawat sa mga benepisyaryo.
Nasayran nga dili ma-release ang second batch nga fuel card subsidy alang sa tuig 2019, kung dili madawat sa mga operator ang singko mil pesos nga unang subsidiya.
Tungod niini, dako ang pagtuo ni Guro nga wala nay interest ang ubang operator nga kuhaon pa ang maong subsidiya tungod kay ang ubang unit nabaligya na o kaha ang original nga tag-iya sa unit dili na makita sa nakapalit.
