Klase-klaseng reaksyon ang gibati sa katawhan sa Cagayan de Oro kalabot sa rekomendasyon ni DILG secretary Eduardo Año nga magsoot og face mask ang katawhan bisan naa sulod balay.
Kasagaran sa mga reaksyon nga gihatag sa katawhan mao ang dili pag-uyon sa maong sugyot tungod kay alang kanila, lisod na matud pang iginhawa ilabina kung igang ang panahon ug gamay ra ang espasyo sa panimalay.
Sa programang Straight to the Point sa RMN-DXCC 828, daghang caller ang miingon nga walay nada ang maong sugyot tungod kay kauban ra man sa pamilya ang naa sa balay busa dili na matud pa angay magsoot pa og face mask aron makalikay sa covid19.
Mahinumduman nga gipasabot ni secretary Año nga dili lang face mask apan lakip na face shield ang sooton sa katawhan ilabina sa mga pamilya nga galisod pagpatuman sa social distancing aron siguradong makalikay sa covid19.
