Miabot sa katorse ka barangay sa Tubaran ug Pagayawan, Lanao del Sur ang apektado sa engkwentro tali sa mga militar ug sa nahibiling mga sakop sa Maute-ISIS group.
Naglangkob sa walo ka mga barangay sa Tubaran nga apektado ang Wago, Guiarong Tubaran, Malaganding, Tubaran Proper, Madaya, Gaput, Dinaigan ug Alog, samtang unom ang sa Pagayawan nga naglakip na sa Padas, Guiarong Pagayawan, Linindingan, Diampaca, Bangon ug Madang.
Matud ni Joint Task Group Ranao deputy commander Col. Romeo Brawner, nga posibleng madugangan pa ang ihap sa mga bakwit ilabina nga nagpadayon ang airstrike sa mga sundalo batok sa grupo ni sub-commander Humam Abdul Romato Najid alyas Abu Dar.
Una nang giangkon ni Brawner nga kaniadto pang Barangay ug SK elections nila nabantayan ang presensya ni Abu Dar sa Tubaran human niini gipatay ang usa ka kandidato sa maong lungsod.
