South Cotabato—himas rehas ang usa ka suspetsadong kawatan kansa midagit matud pa sa mukabat P27,000 nga kantidad sa gadgets nga gipanag-iyahan sa usa ka biktima didto sa Koronadal City.
Nasayran nga mismong ang biktimang si Mary Ann Dela Pena, 26-anyos maoy midakop sa suspek nga si Alias KC Mae, 19 anyos nga taga Barangay Poblacion, Tboli, South Cotabato human gikuha matud pa niini ang mahalong Cellphone ug notepad sa biktima nga igo rang gibutang ibabaw sa lamesa sa usa ka karenderya sa Purok Amuraw, Barangay Sta. Cruz, Koronadal City.
Subay sa sumbong sa biktima ngadto sa kapulisan nasayran nga iyang gibyaan kadali ang iyang gadget sa Lamesa aron moinum ug tubig. Didto na miduol ang suspek ug gikuha ang iyang mga gadget. Swerte usab nga iya kining nakit-an mao nga iyang gisita ang maong babaye.
Siya usab mismo ang mikuha sa iyang mga gadgets sa suspek samtang nagpatabang dayon kini sa mga tawo nga anaa sa lugar aron nga ireport ang suspek sa Koronadal PNP. sa karon ang suspek tingkagol na sa silda sa Koronadal Police Station ug gikatakda na kining pasakaan ug kaso.
