General Santos City–Nag tingkagol karon sa Police Station 1 ang usa ka Jan-Jan Ebrahim Edon, 19 anyuos nga nanimuyo sa Prk. Maguindanao. Barangay Dadiangas South, Gensan human naaktuhang nangawat ug motor atubangan sa usa ka bar sa Narangjita St. Barangay South ala 1:00 ang takna sa kaadlawon.
Sumala pa ni PSI Abdulsalam Mamalinta ang hepe sa Police Station 1 nga nasikop matud pa ang suspect tungod sa tabang sa mga sibilyan nga nakakita nga ginabira sa suspect ang motor sa usa ka Geoffrey Vargas, 32 anyos usa ka bouncer nga nanimuyo sa Alabel Sarangani Province.
Gilayon nga giturn-over sa kapulisan ang suspek kansa nakaangkon ug mga bun-og sa kalawasan human nga misukol samga tawong midangop kaniya.
Sa karon gina imbistigahan matud pa sa kapulisan kung myembro ba sa usa ka organisadong grupo sa pagpangarnap ang suspect human nasayran nga aduna kini kauban nga nakasibat sa maong higayun.
Dugang pa ni PSI Mamnalinta nga ginasuta nila karon kung duna bay kalambigitan ang nasangpit nga suspect sa mga serye sa pagpangawat ug motor sa ilahang area kung diin sagad sa mga nabiktima mao ang XRM nga motorsiklo. (Dave Silagan)
