Pagadian City – Patay ang usa ka ice plant laborer samtang 2 ang nadala sa balay tambalanan sa nahitabong pagleking kon paghungaw sa usa ka kemikal nga gitawag ug Ammonia alas 6 sa gabie kaniadtong nakalabayng adlaw partikyular sa Ramona Fishing Corporation nga nahimutang sa Rizal Avenue, Tuburan District, ning syudad sa Pagadian.
Daling miresponde ang kapulisan dinhi sa syudad ug ang Bureau of Fire Protection lakip na ang PNP Bomb Squad.
Dead on arrival ang biktima nga si Jelmar Montesa Bulay, 19 anyos, adunay ka live in kinsa ice plant laborer sa nasangpit nga fishing corporation ug residente sa Purok Sais, Brgy. Buburan, Bayog ning probinsya sa Zamboanga del Sur.
Ang laing biktima naila nga si Brinton Wasawas, 29 anyos, ulitawo, usa ka machine operator ug kasamtangang nanimuyo sa Ramona (Tukuran) fishing Corp isip stay in employee nga taga Cebu City kinsa gidala sa Aisah Hospital gumikan sa naangkon niini nga mga samad bun-og sa kalawasan.
Gidala usab sa balay-tambalanan ang 60 anyos nga si Alberto Singedas, usa ka harvester operator ug residente sa Prk Lower Lumboy, Brgy Tuburan ning syudad sa Pagadian kinsa nakabati ug pagkalipong gumikan sa nahanggab niini nga kemikal.
Sa pagkakaron padayun pang giimbestigahan sa kapulisan ug sa Bureau of Fire Protection arun masayran ang kinatibuk-ang detalye sa naasoyng chemical leakage.
