TACLOBAN CITY – Nagpositibo ha illegal nga droga an ginhimo nga test han PNP Crime Laboratory ha kilo-kilo nga shabu nga nakit-an ha kabaybayunan han *sitio* pagul Brgy. Pio del pilar han Biri Island, Northern Samar.
Ini in ginturn-over han usa nga 14 anyos nga bata ngan mangirisda nga hi Eduardo Golondrina, 53 anyos ha Biri PNP dida han Sabado, August 10.
9.71 kilo an kabug-aton han shabu nga ginpack ha 5 nga transparent sachet, sumala han PNP Crime Laboratory P66-million an estimated value han nasabi nga mga droga.
Nakabutang ini ha itom nga plastic bag han makit-an han 14 anyos nga bata ngan han mangirisda.
Sumala kan P/LtCol. Francisco Calumba Jr., deputy for operations han Northern Samar Police Provincial Office (NSPPO), padayon an ira ginbubuhat nga mga operasyon bangin mayada pa mga droga ha shoreline han nasabi nga bungto.
Sumala naman kan PNP Region 8 director P/BGen. Dionardo Carlos, naka-alerto na an mga kapulisan ha bug-os nga Eastern Visayas para magbantay ha kabaybayunan.
Siring ni Carlos, ini an first time ha Eastern Visayas nga may nakuha nga shabu ha shoreline, ngan kilo-kilo pa. Dida han 2016, kilo-kilo han cocaine an nakit-an ha Northern Samar.
Han pakianhan han media kun balik na liwat ba an operasyon han druglords ha Eastern Visayas, igindiwara ini ni Carlos.
