General Santos City–Sikop sa gipahigayong buy-bust operation sa mga personahe sa Police Station 1 ang usa ka konduktor sa bus nga nagabyahe sa Koronadal City, alas 6:00 pasado ang takna sa buntag sulod mismo sa Bulaong Terminal, Barangay Dadiangas North.
Gi-ila ni Police Lieutenant Miguel Angelo Quidilla ang Deputy Chief Of Police sa Police Station 1 ang suspect nga si Archie Arevalo, 29 anyos nga temporaryong nanimuyo sa Sarangani Homes, Phase 1, Barangay San Isidro.
Sumala pa ni Lt. Quidilla nga pipila na usab ka adlaw nila nga ginasundan ang suspect human nga makadawat matud pa sila ug impormasyoin gikan sa mga concern citizen nga na-involve sa pagpamaligya ug iligal nga druga ang nasangpit nga konduktor hinungdang nga gikasa ang buy-bust operasyon kung asa nakuhaan kini ug usa ka sachet sa shabu ug ang 500 pesos nga marked money.
Ilado matud pa ang nahisgutang suspect sa maong lugar nga mao ang ginapalitan ug shabu sa Bulaong hinungdan nga dali lang kini napalitan sa kapulisan kung asa gikan matud pa siya ug byahe ug pag-abot sa Bulaong gipahigayon ang transaksyon nga miresulta sa pagkasikop sa suspek.
Kasong pagsupak sa RA 9165 sec 5 sa ART II ang atubangon sa nasangpit nga suspetsado.
Hugot man usab nga gipanghimakak sa suspect nga si Archie nga namaligya kini ug iligal nga droga.
Sumala pa niini nga natingala nalang kini nga giduolan kini sa kapulisan ug gidakop, gani gihingusgan man usab niini nga dili iyaha ang usa ka sachet sa gituohang shabu nga gipakita sa police ngadto na sa media.
Gi-angkon usab sa nahisgutang konduktor nga naga gamitan siya ug iligal nga droga aron nga pang pawala sa kakapoy apan gihingusgan niini nga wala siya nagapamaligya.(Dave Silagan)
