Umapela si Albay Rep. Joey Salceda sa Senado na madaliin na rin ang pag-apruba sa bersyon nila ng panukalang Virology Institute of Science and Technology (VIST) sa bansa.
Matatandaang nakapasa na sa ikatlo at huling pagbasa ang VIST sa Kamara habang nakabinbin pa ang pagtalakay rito sa komite ng Senado.
Giit ni Salceda, pangunahing may-akda at sponsor ng VIST sa Kamara, dapat nang bilisan ang pagpapatibay ng kongreso sa panukala lalo pa at naresolba naman na ang isyu ng pagtatatag ng VIST sa ibang ahensya.
Nagkaroon kasi ng contentions sa pagitan ng pagtatatag ng VIST dahil mayroon namang Research Institute for Tropical Medicine (RITM) ang bansa.
Aniya, nasagot na ito dahil ang RITM ay para sa prevention at control ng mga infectious at tropical diseases tulad ng mga non-viral diseases gaya ng tuberculosis, malaria, meningitis, at cholera na nakasentro sa human transmission.
Samantalang ang VIST naman ay nakatutok sa research at practical work ng mga non-human viruses tulad ng African Swine Fever (ASF), Tungro Disease sa Palay, Coronavirus Disease at iba pang viruses na makikita sa hayop, halaman at tao.
Isa ang VIST sa mga iniapela ni Pangulong Rodrigo Duterte sa kanyang huling State of the Nation Address (SONA) na madaliin na ng Kongreso ang pagapruba na napapanahon ngayong may COVID-19 pandemic.
