Gitudlo ni Mayor Oscar Moreno isip acting Mayor sugod kagahapong adlawa si Councilor Joyleen Mercedes Gerlie Balaba.
Gitudlo usab ni Vice Mayor Joaquin Rainier Uy si councilor Roger Abaday isip Acting Vice Mayor.
Kini nga katudlo-an tungod kay si Mayor Moreno ug Uy milarga padulong sa New York City sa America, aron motambong sa 17th Kagay-anon International TAPOK 2019 hosted by Cagayan de Oro City-Misamis Oriental Association of New York Inc.
Ang venue sa maong Tapok didto ipahigayon sa Sheraton La-Guardia East Hotel.
Lakip sa mga mikuyog sa Moreno delegate silang City Administrator Teodoro “Teddy” Sabugaa ug City Budget Officer Percy Salazar.
Mikoyog usab sa Moreno delegation sila Councilor Teodulfo Lao Jr., Enrico Salcedo, Zaldy Ocon, Suzette Magtajas Daba, Jay Pascual, Ma. Lourdes Gaane ug Edna Dahino.
Matud ni Sabuga-a nga ugma Hulyo 26, sugdan ang pormal nga programa sa Tapok didto sa New York City.
Gidugang ni Sabugaa nga atol sa ilang pagtambong sa Tapok ipa-abot usab ni Mayor Moreno ang iyang dakong pagpasalamat sa Cagayan de Oro City-Misamis Oriental Association of New York Inc., tungod sa ilang tunga sa milyon ka pesos nga donasyon sa pagtukod sa one million pesos nga Day Care Center sa Sitio Singapore, Barangay Balulang ning syudad.
Matud ni Sabuga-a nga didto sa New York, i-presentar usab ni Mayor Moreno ang mga kalamboan karon sa syudad ubos sa iyang administration labina sa iyang tourism program.
Gibutyag ni Sabugaa nga ang ilang pagtambong sa tapok sa New York City dakong opportunidad alang sa Chamber of Commerce ning syudad.
Si Mayor Moreno mobalik sa Cagayan de Oro sa unang semana sa Agosto.
Apan si Councilor Lao ug mga kauban mopa-uli dinhi sa Cagayan de Oro sa Agosto sais.
Kini ang rason nga sa July 29 ug August 5 walay session sa city council.
Apan giklaro ni Lao nga ang ilang biyahe sa New York City walay gasto ang City hall kay ila kining kaugalingong gasto.
Matud ni Lao nga ang iyang round trip ticket mokabat lang sa 40-mil pesos.
