BACOLOD CITY – Nagpahayag sang pagka-dismaya si Councilor Renecito Novero, chairman sang Committee on Housing sang Sangguniang Panglungsod sang syudad sang Bacolod sa sabat sang National Housing Authority angot sa status sang housing project sa Brgy. Felisa.
Nahibalu-an nga nagapangayo sang record ang Bacolod City Council particular ang inventory sang Ciudad de Felisa agud mahibalu-an kon pila ka mga units ang wala sang tag-iya.
Sa sulat sang NHA, ila gina-tudlo ang Philippine National Police nga amo ang maghatag sang lista bangud nga amo proyekto ang para sa mga uniformed personnel sang gobierno.
Apang, nag-sulat man diri ang Police Regional Office 6 nga indi sila makahatag sang inventory bangud man nga sarang ma-kumpromiso ang safety sang kapulisan.
Suno kay Councilor Novero nga nagatudlu-anay sa karon ang NHA kag PNP sa diin wala pa sang klaro nga record kon ano ang matuod-tuod nga status sang kapin 1,500 ka housing units sa Barangay Felisa.
Paathag sang konsehal nga dapat ma-resolba na ang amo nga problema bangud nga padayon nga naga-daan kag nagaka-guba ang mga balay sa diin makabig ini nga usik sa kwarta sang gobierno.
[image: image.png]
