Padayon ang paghingyo ni Councilor Dindo Ramos sa mga taxpayers nga hingalitan ang tax relief ukon ang pag-avail sang 100% nga condonation sa penalties, interest kag surcharges sang ila mga balayran sa idalom sang City Ordinance 936. Nahibaluan nga tubtob bwas na lang nga adlaw available ang 100% condonation sa penalties, interests kag surcharges sang mga delinquent taxpayers sa idalom sang ordinansa nga nangin kontrobersyal matapos nga wala ini gin-implementar sa husto nga tion sang Oktubre bangud sang pagpamalibad ni City Treasurer Jiovani Balalilhi. Kun sa January 2021 na mabayad ang mga taxpayers, 50% na lang ang ma-avail nga condonation sang mga ini. Sarang pa makabayad tubtob bwas, Disyembre 31 sa satellite office sang Land Tax Division sang Bacolod City Treasurer’s Office.
Sa interview sang DYHB kay Ramos, ginpahayag sini nga kapin sa P100-P200 million ang matipon nga revenue bangud sang CO 936 nga magadugang pa sa kaban sang ciudad.
Madumduman nga sang Oktubre, gin-ulan sang komentaryo si Balalilhi sa indi sini pag-implementar sang ordinansa kag ginhimo sini nga rason ang duha ka mga kaso nga ginpasaka sa local governments sa Palawan kag Iloilo bangud sang pagpatuman sang pareho nga ordinansa.
Apang matapos nga gindala sa kahanginan ang isyu partikular sa DYHB, nagbag-o ang desisyon sang City Treasurer kag gin-implementar ang CO 936.
[image: image.png]
