RMN Laoag – Nangipilan ni Laoag City Councilor Roger John “RJ” Fariñas ti notice of appeal iti Court of Appeals a kontra ti desisyon ti korte iti Marcos Hall of Justice mainaig ti pannakaimbalido ti Cockpit Ordinance ti siudad babaen ti Sangguniang Panlalawigan.
Kinuna ni Fariñas a saan nga aminado daytoy iti desisyon ti korte iti sala ni Judge Francisco Quilala iti regional trial court (RTC) Branch 14 pabor ti Sangguniang Panlalawigan kangrunaanna iti issue ti ‘Ultra Vires’ wenno saanen a sakop ti bileg ti pannakatengngel ti nasao nga ordinansa.
“I respect the court’s decision… it has the only power to do so, yet, I filed an appeal in the court of appeals for further review on the case”, innayun ni Fariñas.
Dua a tawen ti napalabas sipud nga naaramid ti city ordinance a mangted ti ‘franchise-to-operate’ kenni Mr. Alejandro ‘Bong’ Taylan para iti Cockpit Arena iti Laoag, ngem, saan a nagballigi daytoy iti Provincial Board session gapu pay laeng ti kinakurang ti requirements. Kinuwestionaran daytoy ni Fariñas nangnangruna ta naideklarar daytoy nga ‘invalid’.
Nupay kasta, nakasagana met ni Board Member Atty. DaVinci Crisostomo, chairperson ti committee on laws ken dagiti miembro ti Sangguniang Panlalawigan iti maudi a pammilin ti korte.
Bernard Ver, RMN News
