Gipahayag ni City Councilor Teodulfo Lao Jr., Chairman sa Committee on Energy sa City Council nga walay ilang mahimo sa konseho niining walay undang ug sunod-sunod nga pagtaas sa presyo sa produktong petrolyo.
“Wala tay mahimo ana, kay world market man gud ang nagdikta ana, bisan ang national government wala gani mahimo ana” matud ni Lao.
Matud ni Lao nga taliwala nga taas na kaayo ang presyo sa petroleum product, wala nay iyang interest nga magpatawag pag meeting sa iyang committee.
“Gawas kon naay issue sa illegal selling of petroleum product, mahimo ta magpatawag og meeting pero kon presyo sa petrolyo ang issue, wala ta ana” matud ni Lao.
`Sa iyang kabahin.
Bisan ang transport sector, mibutyag nga walay ilang mahimo niining taas na kaayo nga presyo sa produktong petrolyo.
Matud ni Ringgo Lago nga Secretary General sa Starex Piston sa Northern Mindanao nga wala nay ilang interest nga maglunsad pag welga batok sa pagtaas sa presyo sa gasolina kon dili mosuporta kanila ang tanang katawhan.
Apan gibutyag ni Lago nga magpadayon ang ilang panawagan kang Presidente Duterte nga ibasura gayud ang Oil deregulation law ug ang excise tax sa petroleum product.
“Kon mabasura kanang Oil deregulation law ug Excise tax sa petroleum products, basin makaginhawa ra ta niining taga liog nga presyo sa produktong petrolyo” matud ni Lago.
Matud ni Lago nga tungod sa ka mahal sa petroleum product hugot bakos sa pamasahero ang mga Jeepny drivers tungod sa ilang kanunay nga pagka alkansi sa ilang pagpamasada.
