Koronadal, South Cotabato—Gibutyag ni South Cotabato Provincial health Officer Dr. Rogelio Aturdidu nga base sa gipahigayong Pro-sectional study nga gipatuman sa buhatan sa Provincial Epidemiology Surveillance Unit kon PESU ngadto na sa kaso sa Covid-19 sa syudad sa Koronadal, aduna nay tulo ka grupo ang mga nagpositibo sa Covid-19.
Una mao ang Party group, ikaduha ang Fish vendor Group ug ang ikatulo mao ang local Hospital Group. Basi sa maong pagtuon, nakit-an nga ang index case sa mga nasangpit ang walay travel history gawas sa South Cotabato ug wala usab silay contact sa mga nagpositibo sa Covid-19.
Wala masayran matud pa kung asa nila nakuha ang virus nga maoy nakatakod ngadto kanila. Tungod niini gikumpirma ni Dr. Aturdidu nga aduna nay Sustained Community Transmission sa syudad sa Koronadal.
Giklaro sa Doktor nga dili pagpanghadlok sa katawhan sa syudad sa Koronadal, sanglit usa matud pa kini ka pagpahimangno aron nga makapangandam ang katawhan ug mas palig-unon pa nila ang pag-amping batok Corona Virus. Nasayran nga sa South Cotabato ang Koronadal palang ug lungsod sa Polomolok maoy gipahigayunan ug pro-sectional study tungod sila ang adunay mas taas nga kaso sa Covid-19.
