Padayon ang imbestigasyon sang Koronadal City Police Station sa motibo kag suspek sa panibag-o nga insidente sang pagpangluthang, alas 12:15 kagaina sang udto sa Purok Diaz, Barangay Sta. Cruz, Koronadal City. Ginkilala ang biktima kay Peter Bermil Carreon, 34-anyos, residente sang Purok Malipayon, Barangay Topland kag secretary sang Koronadal City Van Driver and Operators Association. Suno kay P/Lt. Analiza Domingo base sa ila nga imbestigasyon ang biktima ang nagakaon sa nasambit nga lugar sang tiruhon sang riding in tandem criminal nga sakay sa XRM nga motorsiklo. Ginkumpirmar man ni Lt. Domingo nga gintinguhaan pa sang biktima nga magpalagyo, apang ginlagas ini sang mga suspek. Nakaangkon sang igo sang bala sa mga nagkalain-lain nga parte sang iya nga lawas ang biktima nga nangin tunaan sang iya nga kamatayon. Nakuha naman sa crime scene ang apat ka fired cartridges sang 45 nga kalibre sang armas luthang. Naggwa man sa imbestigasyon suno kay P/Lt. Domingo nga may nabaton na nga pagpamahog sa iya nga kabuhi ang biktima sang nagligad nga tuig tungod nakapablotter suno pa ini.
