Mikunhod ang ihap sa krimen sa Misamis Oriental basi sa pinakaulahing taho ni PNP Provincial Director Rolando Destura.
Kini bunga sa sunod-sunod nga operasyon sa kapolisan batok sa gapayuhot sa illegal nga droga ug pagsikop sa mga wanted nga kriminal.
Sugod sa bulan sa Enero padulong Setyembre ning tuiga, miubos sa walo ang kasong murder, lima ang sa homicide, 20 ang ihap sa physical injury, 68 ka kaso sa pagpanglugos, 114 ka kaso sa robbery ug 361 ka kaso sa pagpangawat.
Sa kinatibuk-an, mikabat sa 2,074 ang gikunhod sa ihap sa krimen sa Misamis Oriental.
Samtang, Gipasalig karon sa Provincial Director nga ilang ipadayon ang ilang operasyon alang sa ilang target nga zero-criminality sa lalawigan.
Bisan sa panawagan sa mga lumad nga mibakwit sa kapitolyo gikan sa Sitio Kamansi, Lagonglong nga ipapahawa sa ilang dapit ang kasundalohan alang sa kalinaw sa tanan, padayon gihapong mihimo sa community support programs ang military pinaagi sa suporta sa local government unit ug ni Gov. Yevgeny Emano.
Gibutyag pa ni 58th Infantry “Dimalulupig” Battalion Commanding Officer Lt. Col. Roy Anthony Derilo nga nahimong instrumento ang gobernador aron mapakaylap ang kalinaw sa Misamis Oriental.
Ang ila matud pang mga kalampusan nakab-ot pinaagi sa tabang ug suporta sa provincial government.
