Gi-anunsiyo sa Office of the Presidential Adviser on the Peace Process o OPAPP, nga malampuson ang gipahigayong panagtagbo kagahapon nila ni Lanao del Norte 2nd District Congressman Bobby Dimaporo ug Abdullah Macapaar alyas Commander Bravo, commander sa North Western Mindanao Front sa Moro Islamic Liberation Front o MILF, didto sa lugar niini sa Camp Bilal sa lungsod sa Munai, Lanao del Norte.
Kini aron sabutan sa duha nga ilang ipadaplin una ang ilang duha ka mga politikanhong baruganan aron makab-ot ang malinawon nga plebisito sa Bangsamoro Organic Law o BOL sa Pebrero.
Lakip mga botante sa Lanao del Norte ang mosalmot sa nasangpit nga plebisito aron desisyonan kung mo-uyon sila nga ipasakop ang mga lungsod sa Pantar, Munai, Baloi, Nunungan, Tagoloan ug Tangkal nga mobulag sa lalawigan aron magpasakop sa Bangsamoro Autonomous Region in Muslim Mindanao o BARRM.
Bisan paman sa mga pamahayag sa pamunuang Dimaporo nga suportado nila ang BOL, apan dayag usab nilang gisupak ang pagbu-ak sa lalawigan tungod kay malinawon ug malampuson na kini, nagpuyo usab nga nagkasinabot ang mga Muslim ug Kristiyano dinhi.
Ang grupo sa MILF ug ubang mga opisyal sa kagamhanang lokal sa Lanao del Norte, sama ni Maigo Mayor Rafael Rizalda, ang aktibo usab nga nangampanya aron botaran ang YES sa umaabot nga plebisito ug hingpit nang masakop ang unom ka mga lungsod ngadto sa Bangsamoro area.
Matud pa ni Peace Secretary Carlito Galvez, kinsa maoy nahimong tulay sa maong makasaysayang panagtagbo nila ni Dimaporo ug Bravo, nga gawas sa plebisito ug pulitika, naghisgot usa ang duha kabahin sa ilang pagka-paryente. (Divina M. Suson)
