KABANKALAN CITY – Tatlo ka mga ginasuspetsuhan katapo sang New People’s Army ang natigayon nga madakpan las 9:20 kagab-i sa Sitio Amian Ilawod, Brgy. Tampalon kon diin ini ang ginsundan sang isa ka engkwentro sa tunga sang mga katapo sang Philipine Army kag mga rebelde sa amo man nga lugar sini gid lamang nga kaagahon.
Nakilala ang mga nadakpan nga amo sanday Jomar Reyes, Alyas Ka Tiny, 28 anyos, pumuluyo sang Brgy. Camansi, Kabankalan City kag katapo sang Platoon 1, South West Front (SWF), Rona Degoso, Alyas Ka Che-che, 18 anyos, Finance kag Logistic Officer sang SWF kag pumoloyo sang Brgy. Asia, Hinobaan kag si Abraham Villanueva alyas Ka Tikboy ginatudlo nga kumander sang grupo ukon Secretary sang Central Negros (CN) kag pumoloyo sang Dancalan, Ilog.
Nakasuksok pa ang tatlo sang itom nga sweatshirt nga may marka nga PKP ukon Partido Komunista ng Pilipinas @50 nga nagakahulugan sang pagsaulog nila sang ila ika-50 anyos nga anibersaryo.
Si Villanueva ang may kaso nga arson, murder kag frustrated murder sa diin narecover naman sa duha ang isa ka .45 kalibre nga pistola, isa ka magasin sini kag 3 ka granada.
Suno kay Lt. Col. Patricio Tomales, ang Commanding Officer sang 15th IB nga ini kasunod sang intelligence report nga may mga katapo sang rebelding NPA nga ara sa lugar sa amu nga gab-i.
Mga las 5:50 kaina sang aga nagpatigayon sang follow-up operation ang 15th IB, 604th Regional Mobile Force Company kag Kabankalan PNP sa lugar kag didto nga may nagluntad nga engkwentro nga naglawig sang 20 minutos sa boundary sang Sitio Amian kag Sito Barunggis sa amo nga barangay.
Narecover sa lugar ang isa ka M16 armalite rifle, mga bala, telekopyo, mga bulong, BP apparatus, mga electronic devices kag mga subersibo nga dokumento.
Wala naman sang napilasan ukon napatay sa bahin sang militar apang suno kay Lt. Col. Tomales apang may ara sa mga rebelde basi sa igo sang bala sa mga nabilin nga bayo kag tinulo sang dugo.
Sa karon padayon pa gid ang pursuit operation nga ginapatigayon sang militar sa palibot. / Photo courtesy of 15th IB
