General Santos City—dakong tabang ang paghatag ug impormasyon sa kumunidad nga miresulta sa pagkasikop sa miyembro sa NPA sa Tboli, South Cotabato. kini ang gibutyag ni Police Chief Inspector Ramil Villagracia, Deputy Chief Of Police sa Tboli Municipal Police Station.
Sumala sa opisyal nga sila nakadawat ug impormasyon gikan sa mga residenti sa Sitio Tabudtud, Barangay New Dumangas, nga anaa sa maong lugar si Rey Mallo Blasé nga sakop sa guerilla front 73, Far South Mindanao Region.
Gilayon nga nagpahigayon ug operasyon ang hiniusang pwersa sa kapulisan ug militar nga miresulta sa pagkasikop niini. Si Blasé adunay kasong arson, kidnapping og illegal detention, siya maoy suspek sa pagpangdagit kang PFC Subere niadtong nakalabayng tuig.
Kini misibat gikan sa lungsod sa Tboli padulong ngadto sa Ilo-Ilo apan ning bag-uhay lang mibalik matud pa kini sa ilang lugar.
Sa kasamtangan ila nang gipahugtan ang ilang siguridad hilabi na nga anaa sa ilang silda nakaditina ang suspetsado. Ilang gipangandaman ang posibling pag rescue sa mga kaubanan sa ilang dinakpan nga sakop sa NPA.Gani nag augment ang South Cotabato PNP ug dugang pwersa ngadto sa Tboli PNP aron mutabang sa pagbantay sa ilang seguridad.
