KWARTA NA, NANGIN BATO PA| Babaye nga nagdaog sa lotto, wala nakuha ang premyo matapos nadula ang winning ticket

7120

Nangin bato pa ang 132, 000.00 nga nadag-an sang isa ka babayi sa 6/58 Ultra lotto matapos nadula ang iya winning ticket .

Suno kay alyas Ana, 45 anyos sang Cadiz City , Negros Occidental ,nagpadulong sila sa opisina sang Philippine Charity Sweepstakes Office – region 6 agud kon tani i-claim ang iya nadag-an nga kwarta matapos naggwa ang lima sa anum ka numero nga iya gintay-an sa September 11 nga draw sang 6/58 Ultra lotto.

Apang dismayado si Ana pati ang abyan nga si Let nga iya gin-utangan sang pamasahe bangud nadula ang winning ticket nga iya gin-ipit sa Bible kag ginsulod sa pouch.

Suno kay Ana, nag CR sila kag may isa ka babaye nga namangkot kon ano ang ila ginahimo sa PCSO.

Ulihi na sang natalupangdan ni Ana nga wala na ang iya pouch kag sang iya ginpangita, yara na ini sa basurahan kag wala na ang winning ticket nga naipit sa Bible .

Panawagan ni Ana sa nagkuha, ibalik lang ang ticket bangud ila na lang tungaon ang premyo.

Nagbulig naman si PCSO Regional Director Jeanette Loyd sa pagpanawagan nga ibalik ang nadula nga ticket ni Ana kag iya ginpasiguro nga indi ini ma-claim sang iban bangud may pangalan kag pirma na ni Ana ang winning ticket.

(photo from web)

Facebook Comments