Padayon pa ang ginahimong imbistigasyon sa Central Office sa Department Of Public Works and Highways kon DPWH kabahin sa sumbong nga gipaabot kanila ni South Cotabato 1st District Representative Sherlyn Bañas Nograles. Sumala pa ni DPWH Secretary Mark Villar nga sa karon aduna nay team nga nagatutok sa maong proyekto ug gisuta kung aduna bay anomaliya nga nahitabo sa maong proyekto nganong gi-usab kini.
Una na matud pang nakaabot kanila ang report nga naka-angkon ug mga minor cracks ang maong tulay tungod sa mga milabay nga mga linog nga mi-igo ingon man ang pag-agi sa mga overloaded nga mga dagkong sakyanan. Apan gipaniguro ni Secretary Villar nga ugaling mogawas sa imbistigasyon nga dili standard ang paghimo niini ilahang sutaon kung kinsa ang may sayop niini ug angayan lamang nga patubagon.
Gipaklaro usab ni Secretary Villar nga sa karon wala siyay tanggalon sa pwesto isip labaw sa DPWH sa Regiyon Dose ug sa South Cotabato District gumikan nagapadayon pa man ang imbistigasyon. (CDS)
