*General Santos City— Subling nagpahimangno si Police Col. Aden Lagradante, City Director sa Gensan City Police Office sa iyahang ginsakupan kalabutan sa managlahing investment scheme nga nanggawas karon sa dakbayan.*
*Sumala niya kanunay ang iyahang ginahimo nga pahimangno ngadto sa mga pulis sa dakbayan alayon sa mga direktibang ginapagawas sa Regional Office 12 ilalom sa pagdumala ni Police BGen. Eliseo Rasco.*
*Pagpaklaro niya nga isip mga opisyal sa kapulisan obligasyon nila nga pahimangnuan ang mga anaa sa lower unit nga dili musulod sa unsa mang investment scheme nga posible silang mabiktima sama sa nahitabo sa Police Paluwagan Movement kon PPM.*
*Lakip usab sa gipahimangnuan ni Pol. Col. Lagradante mao ang publiko nga dili gyud mahaylo sa unsa mang dagko nga mga tanyag sa mga interest aron nga dili mahimong biktima.*
*Mas maayo matud pa nga sutaon una ang mga legalidad sa maong mga kumpanya o grupo aron nga dili mausik ang kwartang i-invest.*
*Saysay niya nga mas maayong panid-an una ang operasyon sa maong mga investment scheme o mga kumpanya aron nga dili magmahay.*
