General Santos City— Subling gibaharan ni Gensan City Councilor Atty. Jeng Gacal, chairman sa games and amusement sa konseho si Police Senior Superintendent Romeo Ruel Berango, OIC City Director sa GenSan City Police Office nga pasakaan ug kasong paglapas sa R.A 9649 kung dili gihapon maghimo ug aksyon batok Small Town Lottery (STL) sa dakbayan.
Sumala niya nga nagpagawas na ug opinion ang legal officer sa Police Regional Office 12, pinaagi ni Police Superintendent Adriel Gran nga gidapigan sa kampo Crame busa wala nay rason si Col. Berango nga dili maghimo ug operasyon batok stl.
Gikasuko man usab niini ang nahimong tubag ni Col. Berango sa hawanan sa konseho nga gimanduan matud pa siya ni Mayor Ronnel Rivera nga dili una magpahigayon ug operasyon sa STL gumikan aduna pay negosasyon nga ginahimo tali sa mga opisyal sa PCSO.
Gikwestyon man usab niini ang kredibilidad ni Col. Berango gumikan sa pabiling buta-bungol sa STL gani iyaha kining gipangutana kung sweldado ba siya sa STL o mismong sa Trento Gaming Corporation nga maoy nagdumala sa STL sa GenSan.
Dugang pamahayag ni Kagawad Gacal nga apil niyang pasakaan ug kaso ang Trento gaming Corporation nga Illegal gambling gumikan sa padayong pagpahigayon ug operasyon sa STL sa syudad bisan ug wala pagpahigayon ug concurrence kon pagpananghid ang PCSO sa hawanan sa konseho nga magsulod ug susamang padula.
