General Santos City–Takdang hulipan sa pwesto ang kasamtangang labaw sa PNP Region 12 nga mao si Police Chief Superintendent Cidrick Train. Subay sa nakuhang special order sa RMN Gensan gikan sa Camp Crame nalatid ang mandate sa paghulip kang Train sa pwesto sa usa ka Police Chief Supt. Marcelo Morales.
Nadawat na matud pa sa PRO 12 ang mandate kaniadto pang December 8, 2017 kung asa napatik nga karong adlawa Lunes December 11, 2017 mamahimo ng mulingkod ang bag-ong Regional Director sa PNP Region 12.
Kahibaluan nga si PCSUPT. Train ang mahimong labaw sa Directorate for Integrated Police Operations for Western Mindanao kon DIPO, base sa migulang special order. Nasayran nga milingkud isip RegionaL Director si PCSUPT Train sa PRO 12 kaniadtong June 09, 2016.
Samtang ang bag-ong muhulip nga mao si PCSUPT. Morales ang kanhiay Deputy Regional Director for Administration sa PRO 11 sa Southern Mindanao og labaw sa PNP Police Maritime Command.
Dugang pa nga si PCSUPT Morales ang miyembro sa Philippine Military Academy Class 1987. Hinuon ang maong impormasyon ang gipanghimakak ni PRO 12 Spokesperson Aldrin Gonzales sa dihang nahinabi sa RMN Gensan kaniadtong milabayng adlawng Sabado.
Sa pamahayag niini nga wala pa niya nakit-an ang maong special Order og kung aduna may kabag-ohan normal lamang kini kanilang mga opisyal sa PNP nga ma re assign kon ma transfer sa ubang mga lugar. (Emir Baiquit)
