General Santos City— Giangkon ni Police Chief Superintendent Marcelo Morales, Regional Director sa Police Regional Office 12 nga luyo pa man sa hugot nga kampanya sa illegal nga droga aduna gihapoy mga nagahilambigit niini.
Pamahayag niini nga ilahang gikabalak-an mao ang mga lambigit sa droga ang dili mahadlok musukol sa kapulisan atol sa mga operasyon. Pagpaklaro niya nga ang kapulisan ang adunay ginatuman sa standard operational procedure rason nga nasayud sila kung kanus-a gamiton ang ilahang mga armas.
Dugang pamahayag ni General Morales nga anaa gihapon ang ilahang mga nadawat nga mga impormasyon kabahin sa pagsulod sa illegal nga droga sa rehiyon. Apan iyahang gibutyag nga dili na sama kaniadto ingon man miubos na usab ang demand sa illegal nga droga tungod sa pagtaas sa presyo niini.
Sa karon matud pa sagad sa mga driogang nagasulod ang gikan sa mga kasikbit nga mga lugar sama sa Cotabato, Marawi ug ARMM.
