Malapatan, Sarangani Province–Nasikop sa hiniusang pwersa sa Malapatan PNP, kauban ang nagkadaiyang unit sa kapulisan sa Sarangani ug PDEA-12 ang usa ka laborer sa gipahigayong buy-bust operation alas 12:30 sa udto sa usa ka beach nga nahimutang sa Sitio Lout, Barangay Poblacion, Malapatan Sarangani, Province.
Ang dinakpan naila sa pangalang Arnel Pantinople, 29 anyos, ulitawo, residente sa sa Purok Sto. Nino 10, Barangay Maribulan, Alabel Sarangani Province.
Nasayran nga atol sa operasyon napalitan ug usa ka sachet sa gikatahapang shabu sa usa ka poseur buyer nga usa ka pulis gamit ang 500 pesos nga buy-bust money, samtang atol sa pagrekisa sa lawas sa suspek nakuhaan pa kini ug lain pang usa ka sachet sa shabu ug mga drug paraphernalia’s.
Sumala pa sa kapulisan nga ang suspek ang anaa sa listahan sa usa sa top priority target sa provincial level ug high value individual sa PDEA 12.
Sa karon nagtingkagol na sa selda sa Malapatan PNP ang suspek ug gi-andam na usab sa kapulisan ang mga dokumento ingon man ang mga ebedensiya nga nakuha kaniya aron ipresentar ngadto na sa korte alang sa pagpasang-at ug kaso sa kalapasan sa RA 9165.(RV)
BORDER SA SARANGANI MAS GIPAHUGTAN BATOK COVID UG ASF
Sarangani Province–Mas pahugtan sa probinsya sa Sarangani ang pagbantay sa mga border niini samtang dili pa klaro ang sitwasyon a tibuok Rehiyon.Kini ang gibutyag ni Sarangani Governor Steve Solon.
Sumala niya nga una na silang nagpahigayon ug panagpulong ni Gensan City Mayor Ronnel Rivera nga ang mga residente sa Sarangani nga walay importanteng transaksyon sa Gensan, ang dili una tugutan nga makasulod.
Kini gumikan padayon pa ang ginahimo nga contact tracing sa LGU Gensan sa mga gidudahang local transmission.
Dugang pamahayag ni Governor Solon nga gawas sa border sa Gensan-Sarangani, ilaha usab ginabantayan ang border sa Sarangani-Davao.
Kini gumikan gawas sa covid, lakip nga ginatutukan mao ang African Swine Fever kon ASF nga masegurong dili makasulod sa probinsya.
Gi-awhag man usab niini ang tanang residente sa Sarangani nga tungod nagpabilin sa MGCQ ang probinsya, mas maayong magpundo lang una sa balay hilabina kung walay mga importanteng himuon sa gawas aron malikayan ang pagkatag sa virus.(LVR)
