General Santos City—Nagpabiling blangko pa ang kapulisan sa pagpamusil patay sa usa ka laborer nga si Romeo Montes, 25 anyos nga taga block 11, Purok 16, Barangay Fatima ning syudad kansa una nang gipusil alas 2:00 ang takna sa hapon kagahapong adlawa sa maong lugar.
Sumala ni Police Inspector Bong Tugonon, Deputy Station Commander sa Police Station 7 nga base sa ilang inisyal nga imbistigasyon anaa sa compound sa iyang silingan ang biktima nagdula ug baraha dihang kalit miabot ang upat ka mga suspek nga sakay sa duha ka motorsiklo.
Kalit gipusil ang biktima makatulong higayon igo sa iyang ulo nga bahin nga hinungdan sa iyang kamatayon. Paspas nga misibat ang mga suspek human sa insidenti.
Nakarekober ang kapulisan ug tulo ka basyo sa kalibre 45 nga armas gikan sa crime scene.
Sa kasamtangan nakig-alayon na ang Fatima Police station ngadto sa mga nakadula ug baraha sa biktima kansa maoy nakakita sa pagpamusil.
Apan sa ilang inisyal nga pakighinabi sa mga testigo, wala nila kaayo namay-ungan ang dagway sa mga suspek gumikan pulos nakatabon ang mga nawong sa mga nahisgutan.
