Gipusil patay ang usa ka laborer kaganinang mga alas sais ang takna sa gabie diha sa C.M. Recto Highway, Brgy. Tablon ning syudad sa Cagayan de Oro.
Naila ang biktima nga usa ka 26 anyos nga si Mark Anthony Fernandez, laborer sa AJ Wood nga ulitawo, residenti sa Purok 6 sa nasangpit nga Barangay.
Matud pa ni PEMS Olimpio Ranulo, ang Police Investigator sa maong krimen, gikan naglingkod ang biktima kauban ang mga ka-trabaho ni-ini dayon nanglakaw na padulong sa ilang pagpamauli. Didto matud pa ni Sargeant Ranulo nga gisabayan kini sa suspek ug gipusil sa likod nga bahin nga milahos ang bala sa dughan ni-ini nga posibleng naigo ang kasing-kasing nga maoy hinungdan sa iyang kamatayon.
Dugang pa ni Ranulo, atol sa pagpamusil naigo usab ang kauban ni-ining 17 anyos sa pulso nga bahin sa iyang kamot. Dihang namatikdan nga nagkadugo na ang biktima, kalit na lamang nga nanggidagan tungod sa kahadlok.
Gikabutyag sa imbestigador sa maong krimen nga posibleng .38 nga pistola ang ginamit sa suspek pagpusil sa biktima sanglit walay basyo kon empty shell nga nakita sa nahitaboan sa maong krimen.
Love triangle karon ang gitutokang anggulo sa PNP Cugman nga motibo sa maong krimen. Kini tungod na usab sa gisaysay sa mga kabanay sa maong biktima nga naay nakarelasyon ni-ini nga babaying duna nay ka-live in.
Padayon ang gihimong imbestigasyon karon sa kapulisan aron nga masikop ang responsable sa maong krimen nga dayong sibat sa wala matinong direksyon human gipusil patay ang biktima.
Kasama mo sa PS10 Cugman, RadyoMaN Andy Coco, DXCC Tatak RMN!
