Padayon ang opisina ni Deputy Speaker Rufus Rodriguez, uban ang Department of Labor and Employment (DOLE) sa distribusyon sa cash assistance, Biyernes sa niaging semana, alang sa mga benepisyaryo sa Tulong Panghanapbuhay sa Ating Disadvantaged/Displaced (TUPAD) Workers.
Ang mga benepisyaro naglangkob sa mga displaced o laid-off workers sa pribado nga mga kompanya sa dakbayan sa Cagayan de Oro.
Mukabat sa 475 ka mga benepisyaryo sa CDO ang midawat sa P6,000 cash assistance o balor P2,850,000 ang suma total.
Ang maong proyekto ubos sa bag-ong gabayan sa Bayanihan 2. Nangulo sa cash distribution mao si Councilor Jocelyn “Bebot” Rodriguez, Brgy. Nazareth Chairman Maximo “Jonjon” Rodriguez, uban ang mga opisyales sa DOLE-X nga si Ms. Karen Joy Mapala (TUPAD-Coordinator), Ms. Norfaydah Cabili, Mr. Julius Reggie Gonzales ug Mr. Martin Dinopol.
Dako ang pagpasalamat ni DS Rodriguez sa hinanali nga aksyon sa gobyerno nasyonal, partikular kang DOLE Secretary Silvestre Bello, sa pag-alokar sa badyet alang sa TUPAD nga nagsilbing dakong tabang alang sa mga trabahanteng nawad-an sa panginabuhian tungod sa COVID-19 pandemic.
Mapasalamaton usab ang opisina ni DS Rodriguez kang DOLE-X Regional Director Albert Gutib, DOLE-X Asst. Regional Director Estrella Pahalla ug Chief Labor Employment Officer Bing Acosta alang sa pag-abag sa maong proyekto.
Niadtong Enero 8, anaa sa 275 nga displaced workers sa dakbyan ang nakadawat sa P3,650 cash assistance o P950,000 ang suma total ubos sa original TUPAD guidelines.
Mukabat na ug P3,850,000 ang nakuhang budget ni DS Rodriguez gikan sa DOLE alang sa 2021. Lain na usab nga mga grupo sa benepisyaryo ang gitakdang makadawat sa cash assistance sa musunod nga adlaw.
Mipasalig si DS Rodriguez ang padayon ang iyang pagpaningkamot nga makakuha ug dugang pundo aron maka-tabang sa mga Kagay-anon, hilabi na sa direktang naapektuhan sa pandemya.
