Laing Nickel Processing Plant tagtakda tukuron sa Surigao del Norte Laing Nickel Processing Plant an plano tukuron diri sa Surigao del Norte sunod na tuig. Ini an kusganong tagbutyag nan Regional Director sa Mines and Geosciences Bureau Roger de Dios, ini human an pagbisita bag-o pa lamang nan Russian Ambassador Igor Khovaev lakip an kadagkuan nan Vi Holdings na kon diin tagpadayag an interes sa pagbubo nan puhunan sa sektor sa pagmina. Tagtudlo pa ni Director de Dios, sa pagpadayag nan amo na kompanya gikan sa Russia an Nickel Processing Plant moabot sa $250 milyon lakip na moakupar nan 100 ektarya sa lupa sa Claver, Surigao del Norte sa pakig-partner sa Platinum Group Metals Corp. (PGMC). Kon matukod na an planta an posible na manginahanglan ini nan 1,000 ka mga trabahante. Dugang pa niini, lahi an teknolohiya an gamiton sa amo na Nickel Processing Plant, wayay karadjaw kemikal na isagol dili pareho sa una na planta na tagtukod sa THPAL.
