Detinado karon ang laing suspek sa pagsunog patay sa upat ka bata ni Melody Cerilio niadtong Marso 10, 2018 sa Corrales Extension, Barangay Puntod ning dakbayan.
Naila ang laing suspek nga si Miquila Dahino Franciso, kinsa nabantayan ni Melody Cerilio nga minaog sa Barangay Macabalan gikan sa gisakyang Balingasag liner.
Sa interview sa dxCC-RMN, gibutyag ni Melody nga iyang gisundan ang suspek nga paingon sa Trans Asia ticketing office aron mokuha og ticket.
Tungod niini, daling miadto sa Macabalan Police Station si Melody ug gireklamo ang suspek nga dali usab nga giadtoan sa mga polis.
Apan mihimakak ang suspek nga siya ang usa sa suspek nga misunog patay sa upat ka mga bata apan hugtanon usab nga giduso ni Melody nga kini ang usa sa mipatay sa iyang mga anak busa gi-detain sa Macabalan Police Station si Dahino.
Mahinumdoman, nga namatay ang unang suspek nga si Michael Dahino human misukol sa mga polis sa Balingasag atol sa operasyon samtang padayong gipangita ang nagtago-tagong laing suspek nga silang Wilma Dahino ug anak niining si John John Dahino.
Sa karon, temporaryong detinado sa Macabalan Police Station si Miquila Francisco kinsa gikatakdang e-inquest karong adlawa sa piskalya.
